Журналісты Васіль Сямашка і Ларыса Кабернік наведалі Кукшынаўскую ды Краснапалянскую пляцоўкі, пагутарылі з мясцовымі жыхарамі. Шмат часу белапанаўцы правялі ў Горках, дзе сустаркаліся з жыхарамі горада, прадстаўнікамі ўлады, актывістамі Горацкай антыядзернай групы. Ім нават давялося зняць працэс збору подпісаў супраць будаўніцтва АЭС, які зараз праходзіць у нашым горадзе. Апошняе інтэрв’ю сталічныя журналісты ўзялі ў старшыні Аўсянкаўскага сельсваету, пасля чаго рушылі ў Магілёў, дзе збіраліся зрабіць заключную частку свайго рэпартажу.

Затрыманне прадстаўнікоў СМІ адбылося якраз чацвёртага сакавіка, на дзень міліцэйскага свята. Як стала вядома далей, супрацоўнікі Ленінскага РАУС Магілёва, якія затрымалі журналістаў, паводзілі сябе неадэкватна. Яны не толькі не здолелі распазнаць службовыя журналісцкія пасведчанні, але не пазналі нават прад’яўленыя ім беларускія пашпарты. Цягам некалькі гадзін прадстаўнікам прэсы прад’яўлялі беспадстаўныя і цалкам не звязаныя паміж сабой абвінавачванні то ва ўжыванні алкаголю за стырном, то ў незаконнай перавозцы спірту…

Аднаму з журналістаў давялося нават настаяць на правядзеньні аналіза крыві, каб даказаць бязглуздасць абвінавачванняў.

Пасля гэтага міліцыянты працягвалі “гуляць у Штырліца”, адабраўшы ў затрыманых частку знятага відэаматарыялу для нейкай “экспертызы”.

Справа завяршылася ў пракуратуры, куды журналісты звярнуліся па абарону.

Эдуард Брокараў