Свежае паветра і шум прыбою не заміналі жанчынам сустрэцца з мэрам Гдыні, які на радасць прысутных распавёў, што да яго горадам кіравала жанчына. Кіраўнік муніцыпалітэту падзяліўся сакрэтамі сваёй работы, адзначыў дасягнутае, падзяліўся планамі.

Наступным пунктам візіту стаў клуб “Інтэграцыя”, які аказвае падтрымку мясцовым інвалідам. Цікавай была і сустрэча з дэпутаткай гарадскога Савету (Сейму) па спорце. Жанчына прызналася, што асабліва не захаплялася спортам і толькі калі ўзначаліла гэты накірунак у Гдыні, зразумела ўсе перавагі здаровага ладу жыцця.

У Цэнтры Жуаны Хацук (дваццацігадовай дзяўчыны, якая ўжо таксама дэпутатка і вядомая на ўсю Гдыню грамадская актывістка) можна было даведацца пра тое, якая дапамога аказваецца дзецям з бедных сем’яў гораду. А пачалося ўсё толькі два гады таму, калі Жуана разам са сваім прыяцелем вырашыла стварыць цэнтр, у якім бы дзеці з маламаёмасных сем’яў маглі бавіць час пасля школы, рыхтаваць разам урокі і гуляць у спартовыя гульні.

Апошнім пунктам вандроўкі стала гімназія №4, дзе школьнікі захапляюцца вандроўкамі па Еўропе. Цэлы год па суботах, калі няма заняткаў і кожны па жаданні можа наведаць школу, яны вывучаюць гісторыю і культуру краіны, у якую збіраюцца сёлета. Напрыканцы навучальнага году ўсе здаюць тэст, лепшыя едуць у вандроўку бясплатна. Гэтак, шкаляры ўжо наведалі Францыю і Італію, налета паедуць у Грэцыю.

Горацкія актывісткі спадзяюцца, што ўбачанае можна будзе калі-небудзь рэалізаваць у Горках.