Раней гэта ўспрымалася як дадзенасць. Цяпер жа працэдура рэгістрацыі прапісана заканадаўча, а, значыць, з’яўляецца абавязковай для садаводаў. У краіне ўсяго больш чым паўмільёна дачнікаў. І сёлета ім трэба падумаць не толькі пра будучыя ўраджаі. Бо зарэгістравалі свае ўчасткі толькі 60% з іх.

Працэдура рэгістрацыі — працэс мудрагелісты і зойме нямала часу. Напісанне заявы, зварот па даведку да старшыні таварыства, затым у райвыканкам, потым «Бегіпразем», дзе за 2 месяцы падрыхтуюць землеўпарадкавальную справу — за яе прыйдзецца выкласці дзесьці 140 тысяч рублёў, затым у абласное агенцтва па дзяржрэгістрацыі і зямельным кадастры.

Гэта ўжо апошняя інстанцыя. Хоць сюды можна прыйсці нават без дакументаў. Пашпарт, заява, — у астатнім, па жаданні кліента, усе неабходныя паперы, будзе шукаць ужо агенцтва. Толькі з пачатку году ў Менскім раёне ўжо зарэгістравана амаль 700 зямельных участкаў і 250 дамоў.

Незарэгістраваны ва ўстаноўленым парадку зямельны ўчастак могуць канфіскаваць.

У любым выпадку кошт будзе не менш за 31 і не больш за 35 тысяч рублёў. Але калі на ўчастку ёсць дом — выйдзе і даўжэй і даражэй. Прыйдзецца аформіць яшчэ і тэхпашпарт на будынак. Дачная рэзідэнцыя плошчай 50 м² абыдзецца ў месяц чакання і 105 тысяч рублёў.

Незарэгістраваны ва ўстаноўленым парадку зямельны ўчастак могуць канфіскаваць. Пра гэта з упэўненасцю гавораць спецыялісты. Забіраць участкі масава і мэтанакіравана, вядома, ніхто не будзе. Аднак калі раённыя ўлады вырашаць пракласці, напрыклад, дарогу і ваш участак стане ў будаўнікоў на шляху — дзяржава яго проста канфіскуе і ніякай кампенсацыі ўладальнік не атрымае.

Па самых сціплых падліках (калі ўзаконьваецца і дом і ўчастак адначасова), на ўсё пра ўсё можа спатрэбіцца 2-3 месяцы. Таму землеўпарадкавальнікі настойліва рэкамендуюць дачнікам паспяшацца.

Паводле АТН & Наша Ніва