Мала хто верыць, што мясцовая міліцыя можа вярнуць скрадзены мабільны тэлефон, а дарма.

Сапраўды, як распавядаюць аператыўнікі, калі ў вас скралі тэлефон на вуліцы і вы пэўны час марудзілі, сумняваючыся, ці трэба заяўляць у Горацкі пастарунак ці не трэба, дык наўрад ці ваша маёмасць стане зноў вашай. Аднак праяўлены спрыт з боку ахвяры можа прынесці плён. Гэтак адбылося з адным з жыхароў нашага горада, у якога на вуліцы папрасілі патэлефанаваць. Сцэнар рабаўніка быў разлічаны на выхаванасць уладальніка “мабілкі”: малады чалавек аддае тэлефон незнаёмцу і далікатна адыходзіць у бок, каб не перашкаджаць размаўляць. У гэты час незнаёмец дае лататы, а гаспадар развітваецца з тэлефонам назаўсёды.

Аднак рабаўніку патрапіўся ўпэўнены ў сабе чалавек. Ён не марудзіў, а адразу звярнуўся да ахоўнікаў правапарадку. Тыя ў сваю чаргу спрацавалі на пяць з плюсам і затрымалі аферыста, а мабільнік перадалі законнаму ўладальніку.